31 март куни “Сидней Олимпик” паркида жойлашган “Австралия” стадионининг матбуот марказида Австралия терма жамоаси бош мураббийи Пим Веербек билан матбуот анжумани ўтказилди.

Голландиялик мутахассис сўз бошлар экан, бутун Австралия аҳолиси терма жамоа футболчиларидан жаҳон чемпионати йўлланмаси масаласини имкон қадар тезроқ ҳал қилишни кутаётганини ва бу вазифани 1 апрель оқшомида уддаланиши мумкинлигини айтиб ўтди.

“Ўзбекистон терма жамоасини кўпчилик осон ютиш мумкин бўлган жамоа деб ҳисоблаяпти. Аммо, биз рақибни жуда ҳам ҳурмат қиламиз. Қатарга қарши учрашувни диққат билан томоша қилдик ва эртанги рақибимизнинг асл кучи қай даражада эканлигини яна бир бора ҳис қилдик. Аммо бу бизнинг орзуларимиз, режаларимизнинг амалга ошишига тўғаноқ бўла олмайди. Биз жаҳон чемпионатига чиқишни истаймиз ва буни тезроқ амалга ошириш ниятидамиз”, - дейди Вербек.

Дарҳақиқат, Австралия терма жамоаси ўз олдига қўйган вазифани вазифани деярли уддалаб бўлган. Йўлланмани расман биринчи бўлиб қўлга киритиш учун Сиднейдаги ўйинда Австралия ғалаба қозонса кифоя. Шунингдек, нариги учрашувда Баҳрайн ва Қатар терма жамоалари ҳам дуранг ўйнаса, Вербек шогирдларининг вазифаси янада осонлашади.

Ушбу шарафли вазифани уддалашга Австралиянинг энг машхур футболчиси Гарри Кьюэлл ҳам ёрдамга чақирилган. Вербек, қисқа муддатли танафффусдан сўнг, “Галатасарой” футболчисининг сафга қайтганидан мамнунлигини яшириб ўтирмади.

“Кьюэллнинг Туркия чемпионатига йўл олиши бизнинг фойдамизга ҳизмат қилди. Агарда у асосий таркибда майдонга тушса, 90 дақиқа ўйнай оладиган тайёргарликка эга. Ундан ҳавотир олмайман”, - дея таъкидлади голландиялик мутахассис.

Таъкидлаш керак, Австралия телевидениеларида мавсум оҳиригача сафдан айрилган Бред Эмертон журналистларга интерьвю берар экан, Ўзбекистон терма жамоасига қарши учрашув Австралияни ҳар қачонгидан ҳам тезроқ жаҳон чемпионатига олиб чиқиши мумкинлиги ҳақида гапирди. Унинг сўзларига кўра, она тупроқдаги учрашув Австралия фойдасига ҳал бўлиши учун барча шароит ва имконият мавжуд.

Австралиялик журналистлар Эмертонни Ўзбекистонга қарши сеҳрли таёқча деб аташмоқда. Эсингизда бўлса, айнан шу футболчи Тошкентдаги ўйинда ғалаба тўпини киритган эди. Аммо 1 апрелдаги баҳсда у майдонга туша олмайди.

Вербек шунингдек, Тим Кейхил ва Марк Брешианолар бўйича шифокорларнинг ҳулосасини кутаётганлигини матбуот анжуманида маълум қиларкан, юқоридаги икки футболчи ҳатто майдонга тушмаслиги мумкинлигини ҳам билдириб ўтди.

Вербекнинг таркиб билан боғлиқ муаммолари, табиийки, етарли. Аммо, Австралияда уларнинг ўрнини боса оладиган кучлар етарли. Буни, ҳатто, “Uzbekistan” деб инглиз тилида ёзилган либосни кийиб олган Ўзбекистон делегациясига тинмай саволлар берган Адам исмли кўчада музқаймоқ сотувчи оддий фуқаро ҳам, “Ассошиатед Пресс”нинг Австралиядаги муҳбири Лиам Фитзгиббон ҳам, “Crowne Plaza” меҳмонхонасидан қўним топган янги зелландиялик туристлар ҳам жуда яхши билишади.

Эслатиб ўтамиз, Австралия – Ўзбекистон учрашуви Тошкент вақти билан соат 14:00 да бошланади.

Санжарбек Ризаев
ЎФФ матбуот котиби
(Сидней, Австралия)