Тошкентда бетоблиги у қадар сезилмаган терма жамоамиз бош мураббийи -  Миржалол Қосимов узоқ йўл сафарида сезиларли даражада шамоллаб қолди. Унинг бетоблиги туфайли ўйин олди матбуот-анжуманида терма жамоамиз менежери Вадим Абрамов иштирок этди.

Терма жамоа шифокорлари Тошкентда жароҳат олган Сервер Жепаровни оёққа турғазиш учун плеймекеримиз устида қандай ишлашаётган бўлишса, Қосимовнинг саломатлиги борасида шунчалик жон куйдирмоқдалар. Чунки учрашув куни аниқ кўрсатмалар бериши учун Қосимовга саломатлик, тетиклик, ғайрат ва жарангдор овоз керак бўлади.

“Саломатлигим борасида шифокорлар мен билан ишлашмоқда”, - дейди Қосимов.

“Умид қиламанки, ўйингача анча яхши бўлиб қоламан. Чунки, шамоллаш жараёни Тошкентдаги ўйин арафасида бошланганди. Касаллик вируси таъсир даражасини камайтирадиган вақт ўтиб кетди. Буни ўзим ҳам жуда яхши ҳис қилиб турибман. Бугун эрталабдан ўзимни янада тетикроқ ҳис қила бошладим”.

Ўзбекистон терма жамоасининг яшил қитъадаги биринчи учрашувида бош мураббий сифатида майдонга бошлаб тушадиган Қосимов ўйинолди машғулотларида қатнашди. У тўп билан муомала қилиш борасида деярли футболчилар билан тенгма-тенг ишлади.

Эслатиб ўтамиз, Австралия - Ўзбекистон учрашуви маҳаллий вақт билан соат 20:00, Тошкент вақти билан соат 14:00 да бошланади. 

Санжарбек Ризаев
ЎФФ матбуот котиби
(Сидней, Австралия)