Учрашувдан кейинги матбуот анжуманига дастлаб ғолиблар устози келди.

- Биз ғалабага эришдик. Лекин бугунги учрашув учун дуранг ҳам мантиқий натижа бўларди. Чунки “Ал-Вахда” ҳам беллашувни ёмон ўтказмади, - деди Луиз Фелипе Сколари. – Мезбонлар, бизга қараганда, тўпни ўзларида яхши ушлаб туришди. Лекин, уларга нисбатан, дарвозага биз кўпроқ зарба бердик.

- “Бунёдкор”нинг гуруҳдан чиқиш имкониятлари ҳақида энди бемалол гапирса бўладими?
- Биз ўз очколаримиз багажини 12тага етказиб олсак яхши бўларди. Ҳозирча икки учрашувда олти очко жамғардик ва гуруҳда биринчи ўринни эгаллаб турибмиз. Бироқ айни маҳалда бу пешқадамлик ҳеч нарсани англатмайди. Қачонки ҳисобимизда 12 очко мавжуд бўлади, биз фақат шундагина енгил нафас олишимиз мумкин.

- Жамоангиз тез футбол намойиш этмади. Қарши ҳужумларда янада тезроқ ҳаракат қилганда, ютуққа янада осонроқ эришиш мумкин эди.
- Бу бизнинг тактикамиз эди. Вазиятга қараб, Жасур Ҳасанов орқали тўпни олдинги чизиқдаги Денилсонга етказишни бош мақсад сифатида белгилаб олгандик. Бу қанчали амалга ошди ёки ошмади, бунга баҳо бериш сизларга.

- Бу ютуқ ўзбек клубларининг Чемпионлар лигасидаги юбилей ўйинига ўзига хос совға бўлди. Ғалаба билан табриклаймиз.
- Раҳмат. Бугун шогирдларим яхши ўйин кўрсатишди. Улар ўз ўйинлари билан шу ғалабага эришишди.

- “Ал-Вахда”ни енгишда энг асосий омил нима бўлди?
- Биз гол киритиш учун хавфли вазиятларни кўп яратдик. “Ал-Вахда”нинг кучсиз ўйинини кўрмадим. Майдон эгалари муносиб тўп суришди. Лекин гол уришга бўлган имкониятлар бизда кўпроқ кузатилди.
Мен “Ал-Вахда”га кейинги учрашувларда омад тилайман. Бу жамоа ҳали ўзини кўрсатади. Йозеф Хикерсбергер каби мутахассис бошқараётган клуб етарли салоҳиятга эга. Мен бу мураббийни яхши биламан. Иккаламиз ЕВРО-2008да Португалия ва Австрия терма жамоаларига устозлик қилганмиз. У билан яна кўришиб, хурсанд бўлдим. Менда “Ал-Вахда” ёмон таассурот қолдирмади.