Бугун эрталаб соат 9:00да “Бунёдкор” Дубай шаҳрига учиб кетди.

Тошкент халқаро аэропортидан парвоз амалга оширган ҳаво кемаси “қалдирғочлар”ни Дубайга етказиб боради. Жамоа бу ердан кейин автобусда учрашув ўтказиладиган жой – БАА пойтахти Абу-Дабига жўнаб кетади. Дубайдан Араб Амирликлари пойтахтигача бўлган масофа 150 километрни ташкил этади.

Шундоққина Форс кўрфази соҳилларида жойлашган Абу-Дабида “Бунёдкор” “Миллениум” меҳмонхонасида истиқомат қилади.

“Ал-Вахда” билан учрашувга Луиз Фелипе Сколари қуйидаги 19 нафар футболчини олиб кетди:
Дарвозабонлар – Игнатий Нестеров, Мурод Зуҳуров ва Муҳиддин Худоёров
Ҳимоячилар – Саҳоб Жўраев, Хайрулла Каримов, Анвар Ғофуров, Руслан Мелзиддинов, Анзур Исмоилов ва Александр Ковалёв
Ярим ҳимоячилар – Жасур Ҳасанов, Ривалдо, Жоао Виктор, Сервер Жепаров, Тимур Кападзе, Азиз Ҳайдаров, Виктор Карпенко ва Анвар Раҳимов
Ҳужумчилар – Денилсон ва Шавкат Саломов

Ортга жамоа чоршанба куни Шаржа орқали қайтади. Яъни дастлаб Абу-Дабидан Шаржага (масофа 170 км) автобусда етиб келиб, “Бунёдкор” сўнг Тошкентга учади. Футболчиларимиз пойтахтимизга соат 17:15да қўнадилар.

Эслатиб ўтамиз, “Ал-Вахда” - “Бунёдкор” учрашуви 9 март куни “Ал-Нахиан” стадионида бўлиб ўтади. Бошланиши – соат 20:20да (Тошкент вақти билан). Мазкур баҳс ЎзМТРКнинг “Спорт” телеканали ҳамда “Машъал” радиоканали орқали жонли эфирга узатилади.