8 март – Халқаро аёллар куни. Ушбу байрам бутун дунёда нишонланади.

“Бунёдкор” жамоасининг ишқибозлари орасида бугунга келиб аёллар ҳам кўпчиликни ташкил қилмоқда. Бу ҳол бизни албатта-да хурсанд этади. “Бунёдкор”нинг ўйини кунлари биз кўп бор гувоҳ бўлганмизки, мухлисаларимиз стадионимизга ташриф буюриб, футболчиларимизни қаттиқ қўллаб-қувватлаб туришади. Буни “қалдирғочлар”нинг майдондаги ва унинг ташқарисидаги ҳар бир вакили яқиндан ҳис этади. Бунинг учун биз барча мухлисаларимиздан миннатдормиз!

Фурсатдан фойдаланиб, “Бунёдкор” футбол клуби азиз ва мўътабар аёлларимизни 8 март байрами – Халқаро хотин-қизлар куни билан чин кўнгилдан муборакбод этади! Бахтимизга онахонларимиз, опа-сингилларимиз, барча-барчаси ҳамиша соғ-омон бўлишсин!

Доимо ҳурмати баланд аёлларимизга жамоа футболчилари ҳам ўз табрикларини алоҳида йўллайдилар.

Мурод Зуҳуров, дарвозабон:
- 8 март – бу ҳамма учун буюк байрам! Гўзал ва муқаддас аёлларимизнинг баҳорги бу байрамини барчамиз чиройли тарзда нишонлашга ҳаракат қиламиз. Чунки улар бунга муносиблар. Бежизга жаннат оналар оёғи остидадир, дейишмайди.
Мен барча-барча аёлларимизга хурсандчилик, тинчлик ва бахт-саодат тилайман!

Жасур Ҳасанов, ярим ҳимоячи:
- Болалигимни эслаганда, онамнинг биз фарзандларини меҳр билан мактабга кузатиб қўйишлари, қайтганимизда қувонч билан кутиб олишлари ёдимга тушади. Футбол мактабида ўқиб юрган кезларим ўйинларда гол урсам, бу ҳақда тезроқ онамга хабар беришни ёқтирардим. Бугун онам ва опа-сингилларим, барча яқинларим “Бунёдкор” билан терма жамоамизнинг ўйинларини қолдирмай кузатиб боришади. Уларнинг эътиборларидан куч-ғайрат оламан.
Футболчи ҳаётида ютуқларга эришиши Худо берган иқтидори ва ўзининг ҳаракатларига боғлиқ дейишади. Бу тўғри. Лекин ота-онасининг дуосини олган ўйинчи ундан ҳам кўп нарсаларга эришади деб ўйлайман. Айниқса, она дуоси билан. Фурсатдан фойдаланиб, юртимиздаги барча аёлларни, оналарни ва опа-сингилларни байрам билан табриклайман.