“Бунёдкор” бош мураббийи Чемпионлар лигасидаги биринчи сафар учрашувидан олдин ўз фикрлари билан ўртоқлашди.

“Қалдирғочлар” бугун “Жар” стадионидаги иккинчи майдонда ўзларининг сафардан олдинги сўнгги машғулотини ўтказишди. Машғулот якунига етгач, Луиз Фелипе Сколари билан қисқача суҳбатлашдик.

- Жаноб Сколари, Бирлашган Араб Амирликларига учиб кетиш олдидан жамоадаги муҳит қандай?
- Ўйинга ҳозирлигимиз ҳар доимгидек олиб борилди. Аммо бир ҳолат борки, у салбий кўринишга эга. Ҳужумчимиз Анвар Солиев машқлар давомида жароҳат олиб, айни дамда даволаниш билан машғул. Яъни менинг ихтиёримдаги ҳужумчилар сони “Ал-Вахда” билан учрашув олдидан биттага камайган. Табиийки, ташқаридан бошқа ҳужумчи жалб эта олмаймиз. Шунинг учун бу бўшлиқни Шавкат Саломов ҳисобига тўлдирмоқчимиз.

- Чемпионлар лигасида “Бунёдкор” яхши старт олди. “Ал-Вахда”га қарши баҳсда ҳам жамоа фақат ғалаба учун тўп сурадими?
- Ҳа, асосий мақсад – 3 очкога эга бўлиш. Бу бизнинг меҳмондаги илк беллашувимиз бўлади. “Ал-Иттиҳод” билан Тошкентда ўйнаганимиз учун, биз уйда албатта ютуққа эришишимиз лозим эди. Биз бунга мажбур эдик. Энди эса, имкони қадар, рақиблар майдонида ҳам очко олишга интилишимиз даркор. Жамоани плей-офф босқичига айнан сафарда қўлга киритиладиган очколар олиб чиқади.

- Демак, Абу-Дабида ҳам ҳужумкор тактика қўллайсиз.
- Биз 23 февраль куни “Жар” стадионида қандай ўйин кўрсатган бўлсак, худди шу ўйинимизни “Ал-Вахда” билан учрашувда ҳам намойиш қиламиз. Имконият туғилди дегунча, ҳар бир вазиятни ижобий якунлаш пайида бўламиз.

- Рақибни буткул ўрганиб бўлгансиз, десак бўлаверадими?
- Ҳа. БААда йиғин ўтказганимизда, мен “Ал-Вахда” иштирокидаги учрашувларни бевосита стадионда кузатдим. Бундан ташқари, бир нечта DVD-дискларни ҳам кўриб чиқдим. Шу боис бу жамоани мен яхши биламан.