Учинчи кундирки, Ўзбекистон олимпия терма жамоаси пойтахтда машғулотлар ўтказмоқда.

Яна икки йилдан сўнг Буюк Британия пойтахтида бўлиб ўтадиган ХХХ ёзги Олимпиадани кўзлаган ҳолда, янги ташкил этилган Ўзбекистон олимпия терма жамоаси 27 февралдан 3 мартгача ўқув-машғулот йиғини ўтказмоқда. Бу йиғин янги олимпия термамиз учун ҳисоб бўйича биринчисидир. Терма жамоага ёшларимизнинг собиқ устози Аҳмад Убайдуллаев бош мураббий этиб тайинланган.

Мазкур йиғин якунида, яъни 3 март куни вакилларимиз Қатарда ушбу мамлакат олимпия терма жамоаси билан ўртоқлик учрашувида майдонга тушишади.

Лондон-2012 саралаш турниригача эса олимпиячиларимиз бу йил Хитойнинг Гуанчжоу шаҳрида 12-27 ноябрь кунлари ўтказиладиган ХVI Осиё ўйинларида тўп сурадилар.

Убайдуллаев биринчи йиғинга “Бунёдкор”дан тўрт нафар футболчини таклиф этган. Улар – дарвозабон Муҳиддин Худоёров, ҳимоячилар Камолиддин Тожибоев ва Абдуқаҳҳор Ҳожиакбаров ҳамда ярим ҳимоячи Дониёр Ҳасанов.