“Бунёдкор” - “Ал-Иттиҳод” баҳсининг энг яхши ўйинчиси деб Сервер Жепаров топилди.

- Ўйлайманки, ўйин ҳаммага ёқди. Беллашув катта тезликларда кечди. Голлар ҳам кўп бўлди, - деди учрашув комиссари томонидан баҳснинг энг яхши ўйинчиси деб расман эътироф этилган ярим ҳимоячимиз.

- 2008 йили қитъанинг энг яхши футболчиси бўлгандингиз. Аммо 2009 йили сизда бироз пасайиш сезилди. Мана, арабларга қарши жудаям чиройли ўйин кўрсатдингиз. Айтингчи, сизнинг футболчи сифатида ўсишингизда Сколарининг хизматлари қанчали бўляпти?
- Сколари – буюк мураббий. Унинг қўл остида ҳар қандай футболчининг савияси ошиб боради. Ўйлайманки, мен ҳам бундан мустасно эмасман.

- “Ал-Иттиҳод”га қандай баҳо берасиз?
- Уларда ҳозир бироз орқага кетиш сезиляпти. Ўзи дунё футболида бир ғалати анъана бор. Ким қайси бир турнирда яхши қатнашса, кейинги мавсумда кўнгилдагидай иштирок эта олмаяпти. Бундан ташқари, “Ал-Иттиҳод”да яқинда бош мураббий алмашган. Аммо, нима бўлганда ҳам, бу жамоани барибир ҳисобдан ўчириб бўлмайди.

- Сиз баҳсда ҳам ҳужумда, ҳатто ҳимояда ҳам ҳаракат қилдингиз. Бу Сколарининг тактикасими?
- Йўқ, ўйин давомида турли хил вазиятлар содир бўлади. Кимдир чарчаб қолиб, баъзида ўз позициясига қайтишга улгурмайди. Шунда жамоадошингнинг ўрнини босишинг лозим. Айнан шунақа ҳолатларда мен ҳам ҳимояга қайтишга мажбурман.

- Кўп вазиятларга эга бўлдингиз-у, лекин гол кирита олмадингиз.
- Ҳа, бу камчилик устида албатта яна ишлашим керак.

- Рақибни ниманинг эвазига осонлик билан енгдинглар?
- Жамоа умуман ҳар бир чизиқда яхши ҳаракат қилди. Балки об-ҳаво ҳам бизнинг фойдамизга бўлгандир. Ахир араблар фақат иссиқ шароитда ўйнашга ўрганиб қолишган.

- Денилсон билан тез тил топишиб кетганга ўхшайсиз.
- Тўғри, у жамоага бирдан киришиб кетди. Ўйинни яхши тушунади. Ўз вақтида ва керакли жойда очилади.

Шундай қилиб, мавсумдаги илк беллашувда энг яхши ўйинчи деб топилиб, Сервер Жепаров йил якунлари бўйича аниқланадиган қитъанинг энг яхши футболчиси номинациясидаги дастлабки 15 очкога эга бўлди. Чемпионлар лигасида учрашув комиссари ўз ҳисоботида баҳсда кимни энг яхши ўйинчи деб кўрсатса, унга шунча очко берилади.